Παραχωρούνται στον "νόθο" Ferrantino Zorzi, ύστερα από αίτηση της μητέρας του Giacomina, δύο σερβενταρίες στην τούρμα Κισάμου στη θέση Πασαγίτσι και στην τούρμα Άρνας στις θέσεις Κίτυρος και Σκλαβοπούλα

Nos Marinus Baduario milex ducha Crete cum nostro consilio notum facimus cunctis presentem paginam inspecturis, nos a viro nobili Blasio Geno rectore Chanee recepisse litteras inter cetera continentes, quod cum Iacobina mater Ferantini Georgii naturalis nuper supplicaverit, quod cum due sergentarie dicti filii sui Ferantini, posite in Kyssamo ad Passagici et in Arena in Kitaro ad Sclavopulam ibi Chanee, secundum ordinem forent stridate et nullus comparverit, qui diceret super eis, et hic Candide similiter forent exclamate, nobis scriberetur, ut dictas sergentarias duas super dictum Ferantinum scribi facere dignaremus, nos rogabat, quatenus ipsas sergentarias super dictum Ferantinum scribi facere vellemus. Quapropter damus et concedimus suprascripto Ferantino et eius heredibus prenominatas duas sergentarias cum omnibus ipsarum habenciis, pertinenciis et villanis post clamorem inde factum secundum usum hic Candide et Chanee nemine comparente, ut dictum est. Quas quidem sergentarias duas idem Ferentinus tenetur defendere et varnire secundum consuetudinem Chanee. Tenetur eciam de fidelitate domino nostro duci Veneciarum, nobis et successoribus nostris imperpetuum et ceteris capitulis concessionis et capitularis millitum Crete. Actum anno MCCCXIIII, mense septembris, indicione XIIIe. Ego Egidius de Iordano diaconus Sancti Geminiani notarius de mandato suprascripti domini duche et sui consilii scripsi